“Xhirimi i episodeve maniakale ishte vërtet çlirues” – Modelja dhe aktivistja Rosie Viva për dokumentarin e saj mbi çrregullimin bipolar

“Herën e parë që fola me të rinj të tjerë me çrregullim bipolar ishte një zbulim i vërtetë”, shpjegon Rosie Viva. “Ishte hera e parë që nuk pata më frikë. E pranova. Mendimi im për veten time ndryshoi plotësisht”.

Viva, një modele, aktiviste e shëndetit mendor dhe tani regjisore që jeton në Londër, sapo ka përfunduar një dokumentar për çrregullimin e saj bipolar. Kjo është hera e dytë që ajo e trajton këtë temë në ekran: e para ishte një projekt personal i realizuar kryesisht gjatë pandemisë, një përpjekje e gjallë dhe intime nga një grua e re për të kuptuar veten përmes përvojave të të tjerëve që jetojnë me të njëjtin çrregullim; e dyta është programi televiziv Modelling, Mania And Me, një rrëfim ndoshta më i butë, por jo më pak ekspozues. Megjithatë, pavarësisht vështirësive të dukshme për t’u filmuar gjatë momenteve të saj më të errëta, për Viva përvoja ishte çliruese.

“Ishte disi e këndshme të shfaqje episodet maniakale të çrregullimit bipolar”, shpjegon ajo. “Kjo çështje mbart ende shumë fshehtësi. Gjithmonë më ka ardhur më shumë turp nga episodet e mia maniakale, sesa ato të depresionit, sepse ato janë më të vështira për t’u kuptuar nga shoqëria. Shumë njerëz e gjejnë veten te momentet e depresionit dhe përpiqen të japin këshilla, por nuk i kuptojnë plotësisht episodet maniakale. Shfaqja e episodeve maniakale në kamera ishte vërtet çliruese”.

Historia e saj duket e krijuar për ekranin: një modele e re e bukur arrestohet në aeroportin Stanstead të Londrës pasi u hodh mbi sportelet e transferimit të bagazheve dhe aktivizoi alarmin e zjarrit. Nuk është diçka që mund ta shpikësh në çast. Pas këtij incidenti katër vite më parë, Viva u shtrua menjëherë në spital, ku më në fund u diagnostikua me çrregullim maniakal dhe jo thjesht me ankth të theksuar, siç e mendonte më parë. Kjo u pasua nga tre muaj kurimi në spital dhe filloi rrugëtimin e saj drejt shërimit.

Ajo që është më interesante në rrëfimin e Viva nuk janë fillimet dramatike, por nuancat e rrugëtimit të saj. “Kur realizon një dokumentar, producentët duan një fund të qartë. Gjithmonë e kam pasur të vështirë të shpjegoj se kjo është diçka me të cilën do të më duhet të përballem për pjesën tjetër të jetës sime. Nuk ka fund; kjo jam unë”, shpjegon ajo.

Viva pranon se shumë njerëz mund të zgjedhin ta tregojnë historinë e tyre në retrospektivë, por ishte e rëndësishme për të që ajo të shfaqej si personi ende në përpjekje për të kuptuar se kush është, me shpresën për t’u ofruar pak ngushëllim të rinjve të tjerë në situata të ngjashme. “Tani jam e lumtur me jetën time sepse e kuptoj më shumë veten. E kuptoj që momentet e mia të errëta ishin për shkak të çrregullimit bipolar dhe e kam pranuar paqësisht”, shton ajo.

Me këtë dokumentar ajo shpreson të nxjerrë në pah simptomat e çrregullimit bipolar, në mënyrë që njerëzit që nuk janë diagnostikuar ende ta shohin atë dhe të marrin ndihmën që u nevojitet. “Përjetimi i këtyre momenteve më ka lejuar t’i vlerësoj gjërat në një mënyrë të re”, thotë ajo. “Kur e di se për çfarë ke nevojë në jetë dhe çfarë të bën të lumtur dhe të sigurt, atëherë tërhiqesh nga ajo. Më parë mendoja se nuk isha normale për shkak të diagnozës, por tani mendoj se ishte mënyra ime e vjetër e të menduarit që ishte anormale. Diagnoza më shpëtoi; tani i jam kthyer një normaliteti të ri”. 
Ndiqeni Modelling, Mania And Me në Channel 4 YouTube Documentaries tani

Marie-Claire Chappet është gazetare e arteve dhe kulturës që jeton në Londër dhe redaktore kontribuese në “Harper’s Bazaar”

Read More

How Pedro Almodóvar’s Vibrant Filmography Tells A Darker Story Of Spain’s Traumatic Past 

“Showing The Highs On Camera Was So Freeing” – Model And Activist Rosie Viva On Her Bipolar Documentary

Till: A Story Of Grief And Resilience In An Unequal World