Njihuni me Ty Sunderland – Titani i jetës së natës queer në Nju Jork
Ty Sunderland është përshkruar nga fansat si organizatori queer i skenës muzikore të qytetit të Nju Jorkut; një lloj magneti për homoseksualët. Sunderland, i lindur në Floridën jugore, i ka bërë vetes emër, duke qenë një nga DJ-të, producentët dhe promovuesit më të kërkuar të festave në Big Apple. Për shembull: një nga eventet e tij më të fundit, festivali “Krenaria e Planetit” biletat e të cilit u shitën të gjitha në Bruklin, tërhoqi 9,000 pjesëmarrës. Kështu që, po, Sunderland njihet si personi që bashkon komunitetin LGBTQIA+ – njësoj si muzika e ikonave, hitet e të cilave ai di si t’i vërtitë.
“Nuk e kisha menduar kurrë se do të bëja këtë”, thotë Sunderland, duke folur për suksesin e tij. “Unë vetëm doja të organizoja festa ku doja të shkoja, sepse ndihesha sikur nuk mund të bëja asgjë tjetër. Për eventin tim të parë [pesë vjet më parë], zbraza llogarinë time të kursimeve për të organizuar personalisht një festë të fshehtë – por me tinguj të një cilësie të lartë muzikore – për të festuar Britney Spears”.
Festa e parë e madhe e Sunderlandit në qytetin e Nju Jorkut “Heaven on Earth”, u organizua në vjeshtën e vitit 2017, e cila u zhvillua në nëntokë (por jo në kuptimin e fjalëpërfjalshëm), pas orarit të rregullt të punës, në një restorant kinez, aty në një nga lagjet e Distriktit Financiar, në “TGI Fridays”. Këto festa u kthyen në strehë të sigurt për të shprehur euforinë queer në pistën e vallëzimit me këngët më të dëgjuara pop dhe me një natyrë të shkujdesur ku çdo sjellje është e pranueshme.
Brenda një kohe shumë të shkurtër “Heaven on Earth” është kthyer në një nga festat “më të nxehta” në pesë distriktet e qytetit, falë ndërthurjes së natyrshme trendi, por jo arrogante të organizatorit.
Dhe më pas erdhi pandemia që e ndërpreu papritur jetën e natës në mbarë botën. “Në fakt fillova të mendoja për të bërë punë të tjera, sepse nuk e dija nëse gjërat do të ktheheshin ndonjëherë si më parë”, thotë ai. Por ashtu si refreni i një kënge që tingëllon fuqishëm sërish në veshët tuaj, ndërsa bota i rikthehet normalitetit, titani queer i jetës së natës në Nju Jork ka qenë më i zënë se kurrë më parë.
Në vijim të shfaqjeve të fundit të profilit të lartë në festivalin muzikor në Coachella dhe në ditëlindjen e Gigi Hadid, ai po organizon një nga koleksionet më të njohura muzikore në Nju Jork, Ty Tea (një bakanal pijesh në natyrë që zgjat me ditë dhe net), e shoqëruar me një festë në anije, e emërtuar me emrin mjaft tërheqës “Gayflower”, dhe evente të tjera më dëfryese. Dhe, sikur të mos mjaftonte kjo, ai sapo ka publikuar një remiks; një rimodifikim gjenial i këngës së këngëtarit të muzikës pop VINCINT (2021), Higher. Për atë ky është debutimi i një karriere premtuese si producent, ku ai shpreson të bëhet njëfarë “alla-Diplo gej”.
Sunderland sjell ndërmend frymëzimet nga jeta e natës, nga Ian Schrager te Susanne Bartsch, si dhe legjenda e ndjerë e Studio 54, Steve Rubell. “Çfarë do të bënte sot nëse nuk do të kishte vdekur nga SIDA?”, mendon Sunderlandi. “Jam i lumtur që jam pjesë e kësaj bote, duke u bërë homazhe atyre që më paraprinë”.
Rob LeDonne është shkrimtar për kulturën dhe komedinë, artikujt e të cilit janë botuar së fundmi në revistat “Billboard”, “Rolling Stone” and “Esquire”
