Një pronar restoranti me çrregullim bipolar i cili ofron një meny që ndryshon humorin

Van Gogh is Bipolar (vGiB), një restorant në Quezon, Filipine, i specializuar në ushqimet që ndryshojnë humorin, u rihap muajin e kaluar për t’u shërbyer klientëve vetëm tetë e nga tetë. Çdo përvojë ofrohet qëllimisht e ndryshme – ambientet e brendshme ndryshojnë rastësisht, po ashtu edhe pjatat çdo ditë në varësi të humorit të pronarit. “Kjo është mënyra si e njoh veten, duke mos ndjekur përherë një linjë të caktuar”, shpjegon pronari dhe kryekuzhinieri Jetro Rafael. 

Pasi u diagnostikua me çrregullim bipolar në vitin 2008, kur ishte 28 vjeç, Rafael filloi të trajtohej me ilaçe të forta. “Për shkak të efekteve anësore të ilaçeve, isha kryesisht i mpirë emocionalisht dhe kjo më bëri të ndihem si mumie e gjallë”, thotë ai. Duke jetuar vazhdimisht me frikë se mos krijonte gjithnjë e më shumë varësi nga këto ilaçe, Rafaeli filloi të studionte ushqimet si metodë për të rregulluar luhatjet e humorit. “Është një dietë që rregullon humorin”, shpjegon ai. Kjo dietë është krijuar për të aktivizuar neurotransmetuesit specifikë në tru si serotonina, dopamina, GABA dhe norepinefrina për të nxitur një ndjesi qetësie dhe lumturie. 

Para ngrënies, klientëve u kërkohet të plotësojnë një pyetësor për të shprehur se si ndihen në atë moment. Duke kuptuar gjendjen aktuale emocionale të klientëve, Rafael e përgatit dhe personalizon menynë sipas çdo klienti. Në menynë e tij që ndryshon vazhdimisht, Rafael përdor përbërës që ndihmojnë në balancimin e serotoninës si vaj peshku (acide yndyrore omega-3) dhe shqeme (magnez) dhe kur takon klientë që janë në ankth, atij i vjen ndërmend një përzierjeje me lëngje frutash të freskëta, kryesisht agrume (vitaminë C) për të ulur nivelet e stresit, të përziera me mjaltë të papërpunuar, e cila sipas disa studimeve ndihmon në reduktimin e ankthit.

Në kërkimet e tij të lidhjes ushqim-humor, Rafael maksimizon çdo përbërës, qoftë i thjeshtë apo i ndërlikuar, për ta përshtatur atë me nevojat individuale të klientëve të tij. Duke e harmonizuar gatimin për të tjerët si gjest dashurie të pakushtëzuar, për Rafaelin “‘Van Gogh is Bipolar’ nuk ushqen vetëm trupin, por edhe shpirtin”. 

Juli Suazo është gazetare e pavarur e stilit të jetesës për “CNN”, “Resy and Eater”, që jeton midis Manilës dhe Londrës