Mënyra si punoj... Solange Azagury-Partridge
Në serinë tonë, ku eksplorojmë gjërat, vendet dhe njerëzit që frymëzojnë jetën e punës së krijuesve, gazetarja Marie-Claire Chappet flet me stilisten që jeton në Londër rreth procesit dhe heronjve të saj krijues
Stolia e parë e dizajnuar nga Solange Azagury-Partridge në vitin 1987 ishte unaza e saj e fejesës. Që atëherë, kjo krijuese autodidakte është shndërruar në një nga stilistet më me ndikim të bizhuterive në Britani, duke themeluar markën me të njëjtin emër në vitin 1990 dhe duke punuar për tre vjet si drejtore kreative e shtëpisë historike Boucheron. Një pjesë e mirë e punës së saj është ekspozuar në koleksionet e përhershme të Victoria and Albert Museum në Londër dhe Les Arts Décoratifs në Muzeun e Luvrit në Paris. Në këtë artikull, ajo flet me Service95 për procesin e punës, idhujt krijues dhe parfumin e saj të ri, Kiss My Lips, frymëzuar nga ikona e saj Hotlips rings…
Për ditën e saj të punës... Më pëlqen të zgjohem dhe të pi kafe në shtrat, të lexoj lajmet dhe të luaj lojën Wordle përpara se t’u përgjigjem disa emaileve urgjente. Nëse më duhet të takoj klientë, më pëlqen t’i çoj për mëngjes ose në Granger & Co në Westbourne Grove ose diku tjetër në Golborne Road. Përndryshe, bëj një shëtitje në park ose në Portobello Road dhe më pas shkoj në zyrë rreth orës 10:00. Mundohem të largohem rreth orës 17:00 dhe të bëj telefonatat dhe të dërgoj emailet e fundit nga shtëpia. Ai moment dedikuar vetvetes në fillim dhe në fund të ditës është vërtet i rëndësishëm për mua.
Për muzikën... Nuk mund të punoj duke dëgjuar muzikë; kam nevojë për qetësi, por çuditërisht parfumi im i ri u frymëzua nga albumi i parë që bleva kur isha e vogël. Ishte kënga Sugar, Sugar nga The Archies, që flet për ëmbëlsinë që mund të të falë një puthje. Për mua, gruaja “Hotlips” zakonisht ka një shpirt argëtues, gazmor, të lumtur dhe të këndshëm. Doja vërtet që parfumi të transmetonte këtë ndjesi gëzimi.
Për frymëzimet e saj... Përpiqem të përdor ide abstrakte si bazë për frymëzim, sesa diçka që tashmë ekziston. Për një koleksion përdora formën fizike të matematikës me gjithë bukurinë e saj. Kjo përkundër faktit se jam shumë keq në matematikë!
Për parfumin qe e identifikon... Përdor gjithmonë parfumin tim Stoned, që e krijova rreth 15 vjet më parë. Është pjesë e imja tashmë. Mendoj se parfumi shkon shkëlqyeshëm me bizhuteritë; ti e mban në lëkurë në të njëjtën mënyrë. Është një tjetër aksesor.
Për veshjen e saj formale... Më pëlqen të gjej një stil dhe t’i përmbahem atij. Në rastin tim, janë bluzat e shkëlqyera të të gjitha ngjyrave. Të preferuarat e mia janë ato të Tucker NYC dhe Alice + Olivia. Nuk jam nga ato që eksperimentojnë me modën, pasi këtë e bëj me bizhuteritë.
Për udhëtimet... Më pëlqen shumë të udhëtoj për qëllime pune; mendoj se është pothuajse më argëtuese sesa të udhëtosh si turist, sepse në atë rast shikon vetëm sipërfaqen e gjërave. Kur udhëton për punë, takon vendasit dhe i eksploron më mirë vendet. Vendet që preferoj të vizitoj janë India, Maroku, Nju Jorku dhe Los Anxhelos.
Për krijimtaritë e tjera... Lexoj jashtëzakonisht shumë, kështu që njerëzit që admiroj vërtet janë shkrimtarët. Më pëlqejnë Chimamanda Ngozi Adichie, Martin Amis dhe Hanya Yanagihara. Si një admiruese e zjarrtë e artit, gjithmonë kam dashur t’i përkushtohesha më shumë pikturës. Aktualisht, kam një koleksion të mrekullueshëm arti. Më e preferuara është një pikturë madhështore e Matthew Day Jackson. Në rast zjarri, atë do të shpëtoja me siguri... nëse do të mund ta ngrija.
Për të fituar energji të reja... Më pëlqen të qëndroj në shtrat 24 orë, në kuptimin e plotë të fjalës. Të lexoj, të fle, të ha dhe të shikoj TV nga shtrati. Kështu më pëlqen të fitoj energji të reja.
Për këshillat mbi karrierën... Këshilla më e mirë që kam marrë është të besoj në vetvete. Për të qenë i suksesshëm, duhet të kesh besim në gjithçka që bën.
Marie-Claire Chappet është gazetare e arteve dhe kulturës që jeton në Londër dhe redaktore kontribuese në “Harper’s Bazaar