Agnes?: Interpretuesja magjepsëse nënujore e botës së artit
Artistja italiane dhe ish-modelja e Guccit Agnes? (e shqiptuar ‘Agnes Questionmark’) e përshkruan veprën e saj si një udhëtim në një vend “ku nimfat dhe krijesat mitologjike bashkëjetojnë me qeniet njerëzore”. Shumë nga shfaqjet e saj zhvillohen nën ujë, ku Agnes? e nxit audiencën të vërë në dyshim jetën e shkurtër të trupave të tyre. “Jam e magjepsur nga koncepti i shndërrimit në çnjerëzor – pjesë e mitologjisë”, thotë ajo.
Arti i saj buron nga një kërkim që synon të kuptojë identitetin e saj: “A nuk isha ende Agnes?; vitin e parë e kalova në kërkim të këtij personazhi tjetër”, shton ajo. Gjatë fëmijërisë së saj, ajo krijoi një lidhje të pathyeshme me oqeanin që tani duket qartë në artin e saj. Babai i saj ishte arkitekt varkash, i pasionuar pas lundrimit, dhe së bashku kalonin shumë muaj në det të hapur. “Kur fillova tranzicionin tim, kuptova se uji kishte një domethënie dhe simbolikë të veçantë për mua. Rrjedhshmëria e detit përputhej me atë të punës sime”, thotë ajo.
Kohët e fundit, Agnes? u shfaq në një fushatë të Valentinos, duke pozuar vetëm me një palë taka fuchsia në platformën Tan-go, së bashku me trans-artisten Nettuno, modelen Lina Giselle dhe DJ Charli, ku ajo duket si një pikturë e periudhës së Rilindjes, në harmoni të përsosur me artin e saj.
Për Transgenesis, performanca afatgjatë e vlerësuar e Agnes? në vitin 2021, shikuesit u ftuan të hynin në një qendër të braktisur rekreacioni, të ecnin nëpër një tunel me dritë të zbehur që i ngjante një arterieje koronare, me skulptura lateksi të ngjashme me fetusin që zbukurojnë anët e saj, që hapeshin në një dhomë të pasqyruar me një dysheme me rërë të bardhë dhe skulptura qeramike që shkëlqejnë nga jeta detare. Agnes? qëndronte mbi një instalacion të madh në formë oktapodi. Të magjepsur, spektatorët e shikonin teksa merrte frymë thellë në harmoni me zhurmën që lëshojnë balenat.
“U ndjeva krejtësisht çnjerëzore, veçanërisht duke parë fytyrat e njerëzve që më shikonin”, shprehet ajo. “Ata po shikonin diçka që nuk e kishin parë kurrë më parë. Ndihesha si një perëndeshë. Doja që ata të mendonin: “Ndodhem diku tjetër, po hyj brenda një mitre në një gjendje tjetër dhe në një dimension të ri”, thotë ajo.
Transgenesis u shfaq për tetë orë në ditë për 23 ditë me radhë. Dita e parë e performancës shënoi edhe fillimin e terapisë së saj hormonale. “Ishte vërtet dërrmuese”, kujton ajo. Por dëshira për të bërë të ditur transformimin e saj është ajo çka i jep asaj mundësi të udhëheqë audiencën në një udhëtim ekzistencial po aq të thellë, duke parë performancën e saj.
Pasi fitoi një bursë për të studiuar praktika të integruara pranë Institutit “Pratt” të Bruklinit në Nju Jork, Agnes? dëshiron të thellojë njohuritë e saj për biologjinë detare për të gjetur mënyra të reja për të tejkaluar kufijtë e perfomancës së saj nënujore. Qëllimi përfundimtar? Të organizojë një ekspozitë në Romë, në qytetin e saj të lindjes, duke shfaqur lulëzimin e saj në “artisten vizionare të vetëshpallur trans-specie” me të cilën ajo identifikohet sot. “Ëndrra ime është të bëj instalacione të mëdha në të gjithë botën! Që të gjithë ta njohin veprën e Agnes?! Që të gjithë të përjetojnë zhdërvjelltësinë!”
Pia Brynteson është ndihmësredaktore e Service95
